ម៉ាស្សា ចាប់ពី ០៥គ្រែ ឬចាប់ពី ០៥កៅអីចុះក្រោម

គោលបំណង៖

ផ្តល់ភាពស្របច្បាប់ដល់ម្ចាស់អាជីវកម្ម និងការពារផលប្រយោជន៍របស់ប្រជាជនដែលទៅរកសេវាកម្ម ផលិតផលនៃអាជីវកម្មនោះ។

ស្តង់ដារសេវា៖

ម៉ាស្សា ចាប់ពី ០៥គ្រែ ឬចាប់ពី ០៥កៅអី ចុះក្រោម
•    តម្លៃសេវាជាក់លាក់ៈ ២៦០ ០០០ រៀល ក្នុង ១ច្បាប់
•    រយៈពេលអតិបរមាៈ ២៨ថ្ងៃ (ថ្ងៃធ្វើការ)
•    សុពលភាពៈ ០១ឆ្នាំ

តម្រូវការឯកសារ ដើម្បីទទួលបានសេវា៖

ដើម្បីទទួលបានសេវាសម្រាប់ការបើកកន្លែងម៉ាស្សា ចាប់ពី ០៥គ្រែ ឬចាប់ពី ០៥កៅអី ចុះក្រោម អ្នកប្រើប្រាស់សេវាត្រូវយកភ្ជាប់មកជាមួយ រួមមាន៖
•    អត្តសញ្ញាណប័ណ្ណ ឬលិខិតឆ្លងដែន ចំនួន ១ច្បាប់
•    វិញ្ញាបនបត្របញ្ញាក់ភាពត្រឹមត្រូវសំណង់ ឬជួសជុល ឬកម្មសិទ្ធិចេញដោយ មន្ទីរ ឬការិយាល័យរៀបចំដែនដីនគរូបនីយកម្ម និងសំណង់ (ថតចម្លង) ចំនួន ១ច្បាប់
•    លិខិតបញ្ជាក់លើប្រព័ន្ធគ្រប់គ្រងការពារអគ្គិភ័យ ចេញដោយស្នងការដ្ឋាននគរបាល ឬអធិការដ្ឋាននគរបាល (ថតចម្លង) ចំនួន ១ច្បាប់
•    លិខិតបញ្ជាក់លើអនាម័យចេញដោយ មន្ទីរសុខាភិបាល (ថតចម្លង) ចំនួន ១ច្បាប់
•    ប័ណ្ណពន្ធប៉ាតង់ (ថតចម្លង) ចំនួន ១ច្បាប់
•    រូបថត ៤x៦ របស់អ្នកគ្រប់គ្រង ចំនួន ៣សន្លឹក

នីតិវិធីនៃការផ្ដល់សេវា៖

នីតិវិធីនៃការផ្តល់សេវាសម្រាប់ការបើកកន្លែងម៉ាស្សា ចាប់ពី ០៥គ្រែ ឬចាប់ពី ០៥កៅអី ចុះក្រោម មានចំនួន ១៦ដំណាក់កាលដូចខាងក្រោម៖

១. អតិថិជនដាក់ពាក្យស្នើសុំសេវានៅមន្ត្រីផ្តល់ទទួលព័ត៌មានដែលនៅផ្នែកជួរមុខ
២. អតិថិជនទទួលបង្កាន់ដៃទទួលពាក្យពីមន្ត្រីផ្តល់ព័ត៌មាន
៣. មន្ត្រីផ្តល់ទទួលព័ត៌មានបញ្ជូនពាក្យស្នើសុំទៅបេឡាករ
៤. អតិថិជនអញ្ជើញទៅបងប្រាក់ថ្លៃសេវានៅបេឡាករ
៥. អតិថិជនទទួលបង្កាន់ដៃបង់ប្រាក់ថ្លៃសេវា
៦. មន្ត្រីផ្តល់ទទួលព័ត៌មានបញ្ជូនពាក្យស្នើសុំទៅប្រធានការិយាល័យច្រកចេញចូលតែមួយ
៧. ប្រធានការិយាល័យច្រកចេញចូលតែមួយបញ្ជូនទៅមន្ត្រីបច្ចេកទេសដែលនៅផ្នែកជួរក្រោយ
៨. មន្ត្រីបច្ចេកទេសធ្វើដំណើរទៅទីតាំងស្នើសុំដើម្បីពិនិត្យនិងវាយតម្លៃ
៩. មន្ត្រីបច្ចេកទេសត្រូវធ្វើរបាយការណ៍បន្ទាប់ពីពិនិត្យនិងវាយតម្លៃរួច
១០. បញ្ជូនរបាយការណ៍មកប្រធានការិយាល័យច្រកចេញចូលតែមួយ
១១. ប្រធានការិយាល័យច្រកចេញចូលតែមួយដាក់របាយការណ៍ជូននាយករដ្ឋបាលដើម្បីពិនិត្យបន្ត
១២. បន្តដាក់របាយការណ៍ជូនអភិបាលដើម្បីពិនិត្យនិងសំរេចចុងក្រោយ
១៣. មន្ត្រីរដ្ឋបាលស្រុក ធ្វើការចុះលេខ
១៤. បញ្ជូនអាជ្ញាប័ណ្ណទៅប្រធានការិយាល័យច្រកចេញចូលតែមួយបន្ទាប់ពីចុះលេខរួច
១៥. បញ្ជូនអាជ្ញាប័ណ្ណបន្តទៅមន្ត្រីផ្តល់ទទួលព័ត៌មានដែលនៅផ្នែកជួរមុខ
១៦. ផ្តល់អាជ្ញាប័ណ្ណដែលជាលទ្ធផលជូនអតិថិជន។